સુરતમાં મહિલા અને તેની પુત્રી પર દુષ્કર્મ અને હત્યાના કેસમાં દોષિતને ફાંસીની સજા

સુરતની વિશેષ અદાલતે આજે એક મહિલા અને તેની 11 વર્ષની પુત્રી પર દુષ્કર્મ અને હત્યા કેસમાં મુખ્ય આરોપી હર્ષ ગુર્જરને ફાંસીની સજા ફટકારી છે, જ્યારે સહ આરોપી હરિઓમને આજીવન કેદની સજા ફટકારવામાં આવી છે. આ સાથે પીડિત પરિવારને સાડા સાત લાખ રૂપિયાનું વળતર આપવાનો પણ આદેશ આપવામાં આવ્યો છે. હત્યા કર્યા બાદ બંને ફરાર થઈ ગયા હતા, અમદાવાદ ક્રાઈમ બ્રાન્ચની ટીમે બંનેને રાજસ્થાનથી પકડીને લાવી હતી.

સુરતના કામરેજ વિસ્તારમાં રહેતો મુખ્ય આરોપી હરસહાય ગુર્જર મૂળ રાજસ્થાનનો છે. માર્ચ 2018માં તે 35 વર્ષની મહિલા અને તેની 11 વર્ષની પુત્રીને પોતાની સાથે રાખવા માટે ઘરે લઈ ગયો હતો. બંને વચ્ચે કોઈ બાબતે ઝઘડો થતાં હર્ષે હરિઓમ સાથે મળીને પુત્રીની સામે મહિલાની હત્યા કરી લાશ જીવાબડિયા વિસ્તારમાં ફેંકી દીધી હતી. બંને આરોપીઓએ મહિલાની પુત્રીને ચૂપ રહેવાની ધમકી આપી હતી અને તેની સાથે દુષ્કર્મ પણ કર્યું હતું. જ્યારે તેણે વિરોધ કર્યો, તો તેના ગુપ્તાંગમાં ધાતુના ટુકડા નાખ્યા, જેના કારણે તેને તડપી તડપી દમ તોડી દીધો અને તેનું મૃત્યુ થઇ ગયું.

પીડિત પરિવારને સાડા સાત લાખ રૂપિયાનું વળતર આપવાનો આદેશ

પોલીસને 6 એપ્રિલ, 2018ના રોજ વદોદ નજીક મહિલાની પુત્રીનો મૃતદેહ મળી આવ્યો હતો, જ્યારે મહિલાનો મૃતદેહ 9 એપ્રિલ, 2018ના રોજ વિકૃત હાલતમાં મળી આવ્યો હતો. અમદાવાદ ક્રાઈમ બ્રાન્ચને આ કેસ તપાસ માટે સોંપવામાં આવ્યો હતો. સીસીટીવી ફૂટેજમાં દેખાતા હરસહાઈની કારની હેડલાઈટના આધારે તેની ધરપકડ કરવામાં આવી હતી. પ્રોટેક્શન ઓફ ચિલ્ડ્રન ફ્રોમ સેક્સ્યુઅલ ઓફેન્સ (PACSO) એક્ટ અને IPC હેઠળ સ્પેશિયલ જજ એએચ ધામાણીએ ગયા શુક્રવારે બંનેને દુષ્કર્મ અને હત્યાના દોષી ઠેરવ્યા હતા.

સરકારી વકીલ પી.એન.પરમારે ગુનેગારોના ગુનાને જઘન્ય ગણાવી બંનેને ફાંસીની સજાની માંગ કરી હતી, પરંતુ હરસહાયને ફાંસી અને હરિઓમને આજીવન કેદની સજા ફટકારવામાં આવી હતી. કોર્ટે પીડિત પરિવારને 7.50 લાખ રૂપિયાનું વળતર ચૂકવવાનો પણ નિર્દેશ આપ્યો છે.