જાણો ભારતમાં કેટલા લોકોની આવક 100 કરોડ રૂપિયા કરતાં વધારે છે, નાણામંત્રીએ જણાવ્યા આકડા

2020-21માં ભારતમાં 100 કરોડ કે તેનાથી વધુની કુલ આવક જાહેર કરનાર વ્યક્તિઓની સંખ્યા 136 હતી. આવા લોકોની સંખ્યા 2019-20માં 141 અને 2018-19માં 77 હતી. આ માહિતી નાણામંત્રી નિર્મલા સીતારમણે મંગળવારે આપી હતી. તેમણે રાજ્યસભામાં એક પ્રશ્નના લેખિત જવાબમાં આ માહિતી આપી હતી. તેમણે કહ્યું કે છેલ્લા ત્રણ આકારણી વર્ષ દરમિયાન આવકવેરા વિભાગમાં દાખલ કરાયેલા આવકવેરા રિટર્નમાં રૂ.100 કરોડ (એક અબજ) થી વધુની કુલ આવક જાહેર કરનાર વ્યક્તિઓની સંખ્યા 2020-21માં 136 હતી.

તેમને એક સવાલ પૂછવામાં આવ્યો કે શું એ વાત સાચી છે કે લોકડાઉન દરમિયાન દેશમાં અબજોપતિઓની સંખ્યામાં વધારો જોવા મળ્યો છે? જવાબમાં નાણામંત્રીએ કહ્યું કે સેન્ટ્રલ બોર્ડ ઓફ ડાયરેક્ટ ટેક્સ (CBDT) પાસે ઉપલબ્ધ માહિતી મુજબ, પ્રત્યક્ષ કર હેઠળ ટ્રિલિયોનેર શબ્દની કોઈ કાયદાકીય અથવા વહીવટી વ્યાખ્યા નથી.

વ્યક્તિગત કરદાતાની સંપૂર્ણ સંપત્તિ વિશે કોઈ માહિતી: તેમણે જણાવ્યું હતું કે એપ્રિલ 2016 માં સંપત્તિ કર નાબૂદ કરવામાં આવ્યો હોવાથી, સીબીડીટી હવે વ્યક્તિગત કરદાતાની સંપૂર્ણ સંપત્તિ પર કોઈ માહિતી જાળવી રાખતી નથી. તેમણે કહ્યું કે સત્તાવાર ગરીબીનો અંદાજ આંકડાશાસ્ત્ર અને કાર્યક્રમ અમલીકરણ મંત્રાલયની રાષ્ટ્રીય નમૂના સર્વે કાર્યાલય (NSSO) દ્વારા હાથ ધરવામાં આવેલા ઘરેલુ ગ્રાહક ખર્ચ પર સર્વે પર આધારિત છે.

2011-12માં કેટલા લોકો ગરીબી રેખા નીચે હતા? ગરીબીના અંદાજ મુજબ, વર્તમાન તેંડુલકર સમિતિની પદ્ધતિને અનુસરીને 2011-12માં ભારતમાં ગરીબી રેખા નીચે જીવતા લોકોની સંખ્યા 27 કરોડ (21.9 ટકા) હોવાનો અંદાજ હતો. નાણામંત્રીએ કહ્યું કે સરકારે ‘સબકા સાથ, સબકા વિકાસ, સબકા વિશ્વાસ’ પર ભાર મૂકતા વિવિધ યોજનાઓ શરૂ કરી છે જેનો ઉદ્દેશ લોકોના જીવનની ગુણવત્તામાં સુધારો લાવવાનો અને ઝડપી સમાવેશી વૃદ્ધિ તરફ દોરી જવાનો છે.